來年三破 蔡伯勵預言 樓市跌 紛爭多

隔牆有耳：來年三破　蔡伯勵預言
樓市跌　紛爭多

今年嘅香港，喺梁班子治下，紛亂中度過。2016年又會點？中華總商會刊物《商薈》搵來曆法權威蔡伯勵談丙申年嘅香港運勢。蔡大師話明年1月1日係破日、 正月初一又係破日，連立春都係破月。「破」得都唔係好吉利，而「三破」落喺重要日子，2012年都試過，嗰年發生嘅重要事，包括咗鬼節出世嘅梁振英當選特 首！但蔡大師話2012年農曆破日為期甚短，同2016年之「破」不可同日而語，但願香港明年「破中有成」喎！
蔡大師預言，2016年係明爭暗鬥 嘅一年，無論商業、政治都會有好多糾紛，商業更加麻麻，金融市場淡靜，樓價有下滑趨勢。政界有乜「糾紛」？八方同大家數一數，立法會新界東2月補選、9月 到立法會換屆選舉，年底就係特首跑馬仔前哨戰嘅選委會選舉，試問爭位又點會唔多紛爭？一旦樓市跌、經濟差，市民對管治嘅不滿肯定升溫，遊行示威頻頻，相信 爭取連任嘅梁振英，都未必有覺好瞓。

蔡伯勵

破中有成秋後轉和諧

大家咪以為，紛爭止於政壇噃，蔡大師話受破日影響，連民眾之間都有唔少爭拗，當然仲包括中港兩地嘅紛爭啦！睇怕政府又要諗計仔，點樣紓緩中港矛盾噃！
不 過呢，大家又唔使咁灰嘅，開講有話：有破壞先有建設嘛！蔡大師預言，2016年大家鬧交都可以鬧出個雙贏局面，「破中有成」，特別到咗秋天，雙方都會意識 到相爭無益、改為關注社會民生，到冬天就意興闌珊，休養生息喇！總結一句，來年雖然爭拗多，百業淡靜，但香港風水都屬吉格，點都唔差得去邊嘅！

李八方
pf_lee@appledaily.com