陸sir教炒波幅

炒波幅（１）

美股又升，由於晶片全球需求上升，刺激晶片股價，而油股相對油價亦顯得便宜，油股又升，道指全日向上，升９４點，升幅０．７％，升上１２９９２點，而標普５００指數升上１４２３點，創出４個月的高位，看來道指亦將要衝高。
　　
　　有網友提到買「牛熊同體」的問題（即同時買牛證及熊證），問係唔係等如買「馬鞍式期權組合」，當中涉及一些投機的概念，值得一談。

　　
　　衍生工具的源起，是作為實貨生產者、交易者、投資者的對沖工具，麵包商人預期小麥會漲價，令麵粉價升，所以事先買入小麥期貨，以對沖將來麵粉價升推高成本的風險。但後來搞吓搞吓，搞出金融工具的期貨、期權，例如指數期貨，好多人只是單邊買入，炒作一個方向，完全沒有對沖的意義，變成純粹的投機。

　　
　　我經常講，投機唔緊要，要知道自己在投機，知道投機等如在賭博，用正確的方法去投機，並且控制注碼，小注怡情，並無大壞，你去澳門入賭場，一般人唔會攞全副身家５萬、１０萬去賭一舖，但如果你唔知自己係賭，攞全副身家買窩輪，好容易一舖賭身家。


例如講睇市，好多人賭一個方向，估個市升定跌，贏時全贏，輸者輸清，所以熱切討論買牛仔定買熊仔（即買牛證及熊證），考眼光，賭一舖。


你叫我估今個月大市到期指結算前的走向，我會咁估，現時係大波動的前夕格局，呢個月唔似會好牛皮咁完結，意味著指數不是停在現水平完結，可能有大波動在後頭，唔係大升就係大跌。一般人的反應會話，咁講咗等如無講，咁即係升定跌啫？問呢個問題的人唔係專業炒家，炒家首先要決定有無波動，無波動，好多嘢都無得炒，有波動，單係波幅已經可以炒（炒波幅方法容後談）。


但你再追問我點估呢個月大市方向，我會估向上突破，命中機會約７０％，即係有３０％機會估錯，估錯時大市下挫或唔升。如果係咁，假如我係投機者，除咗全線睇好買認購期權之外，又可唔可以同時買番少少認沽期權來對沖風險呢？

假設我本來想買１０張２６０００點的認購期權，期權金是２９８點一張（每點５０元），即係話結算時，期指結算價要升到２６２９８點（２６０００點加２９８點），才可收回成本，要升到呢個水位以上，才可以有錢賺。但我都係相信自己只有７０％機會命中，另外３０％機會錯，可能牛皮市，即使有升都不能升到２６２９８點咁高，或者係跌市，咁又可唔可以同時買少少認沽期權來對沖風險呢？如果我買番２張２５０００點的認沽期權，期權金３５２點，即係話期指結算時，期指插到２４６４８點以下，這些認沽期權就有得賺，可以補番少少買認購期權的損失。如果把呢兩張買保險的認沽期權期權金加起來，共付７０４點，將呢筆「保險金」計入原先買認購期權的成本內，１０張認購期權，等如每張多付７０．４點的保險金，加埋原先每張２９８點的期權金，加埋保險費的成本是３６８．４點，即係期指在２６３６８．４點樓上結算，才可以賺錢。假設大市走勢愈來愈對辦，朝向我估的向好走勢，我認為最後估中的機會上升到９０％，那時可以沽出作對沖的２張認沽期權，收番少少渣，減少對沖成本。


買輪的原理和買期權一樣，所以話「牛熊同體」，同時買牛輪和熊輪，不一定係等量，除了買自己估計走勢的窩輪外，亦可以買少少自己估的走勢相反的窩輪，作為對沖。記住這些衍生工具時間值天天耗損，睇一段一唔啱方向，要馬上斬倉走人。


另一個可能係純炒波動，不炒方向，以期權為例，上述提到的「馬鞍式期權組合」，就係同時買入同一月份相同行使價的認購期權和認沽期權，例如你同時買入５月結算２５２００點的認購期權和認沽期權，認購期權的期權金是７０４點，認沽期權的期權金是４２２點，同時買一份認購一份認沽合共付出１１２６點，你要賭期指將有大波動，一係大幅向上走，一係大幅向下走，向上期指結算價要在２６３２６點以上（２５２００點加１１２６點），才有錢賺。向下期指結算價要在２４０７４點以下（２５２００點減１１２６點），才有錢賺。


另有一個類似的方法是買入「勒束式組合」，即買入相同月份但較高行使價的認購期權及較低行使價認沽期權。它和馬鞍式組合不同之處，它不是買入同一認購價的認購和認沽，是買入兩邊都價外的期權，例如買入２６０００點行使價的認購期權，期權金是２９８點，同時買入２５０００點的認沽期權，期權金係３５２點，兩邊共付出６５０點的期權金，即係話如果期指升，結算時要升到２６６５０點樓上（２６０００點加６５０點），才有錢賺，如果跌，要跌到２４３５０點樓下，才有錢賺。


買入「馬鞍式期權組合」或「勒束式期權組合」，亦都係牛熊同體，而且不賭走勢，只賭波幅，買入這些組合對大市走勢的看法中性，但估計有大波幅，所以才這樣下注，若果大市波幅不如他的想像，以上述的例子，期指在２４３５０點至２６６５０點中間結算，買入勒束式組合就會輸清。所以倒過來說，如果你賭波動不大，就要做沽家，沽出馬鞍式或勒束式組合。


你睇完我講上面一大堆東西，或者睇唔明，或者覺得自己不會炒得咁複雜，但我想話你知，窩輪和期權的原理一樣，如果你唔明期權的運作，亦都唔會明窩輪的運作，咁樣最好唔好炒輪，否則你買窩輪睇錯方向固然會輸錢，睇中方向亦贏唔到錢，皆因你未明它的運作原理。


另外，炒作大市方向，只係眾多炒作方式的一種，你亦可以炒方向之餘買保險，亦可以不炒方向，只炒有波動或無波動。炒作世界，要求極高水平的操作，普通人無咁既時間和智力，貿然參與炒作，交學費者多，好難贏錢。

陸羽仁


炒波幅（２）
我寫「炒波幅」的網誌，真正目的不是想教大家去炒波幅，相反地，係想嚇怕大家，讓大家唔好亂咁去炒波幅，至少唔好覺得炒波幅好易贏，其實大部份人想追逐大市的波幅，炒來炒去，經常進出，好易得個桔，其至手上個桔會愈玩愈細。

我在文中說「炒波幅方法容後談」，其實文中的後段已談了，講了一種專業的方法，我可以再總結一下，股市有方向，升或跌，你可以買方向；但股市亦有波幅，經常上上落落，你可以不買方向買波幅，甚麼叫買波幅，就係賭大市的波幅大或波幅細，你估波幅大，就可以如上文那樣，買入一個「馬鞍式期權組合」，或買入一個「勒束式期權組合」，因為估計大市會大幅向上或向下波動，當最後如你所願，大幅波動，即使計入買入雙邊期權的成本，你還有錢賺。倒過來，如果估計大市波動較細，就應該反過來做沽家，沽出「馬鞍式期權組合」，或沽出「勒束式期權組合」，因為估計大市只會輕微波動，例如在１０００點的水位上下行走，只要最後波動不超出你上下沽期權的範圍，就可以上下期權金都殺哂。

我估計我寫這些東西，有一半以上的網友睇唔明，我寫來嚇吓大家，睇唔明就唔好亂做。你可能話，從無買期權，你唔使嚇我。我就話，你同時買入價外的牛證和價外的熊證，就等如買入一個勒束式的期權組合，如果你唔怕佢o既原理，你又點炒呢？

窩輪等如期權，但期權不但可以做買家，也可以做沽家（沽家有無限風險，散戶不應輕易嘗試），但散戶在窩輪交易中只可以做買家，沽家只可以是發行窩輪的輪商，唔好以為你買了認沽輪就做咗窩輪沽家，你只是買入一個認沽期權而矣，仍然是買家。

我見不少網友話佢牛熊同體，即是同時買入認購輪和認沽輪，我就話咁樣等如買入「馬鞍式期權」或「勒束式期權」，如上面所講，做這些期權的買家，你應該係估計大市會大波動，一係大波動向上，一係大波動向下，如果唔係咁，你好難賺錢。

但現實中我覺得散戶話做牛熊同體，背後原因可能只係睇唔準大市的方向，唔知大市想升定想跌，又唔知佢波幅大細，只係唔知佢想點，所以同時買牛證同熊證，並唔係估佢有大波幅才去買；不明原理去買衍生工具，胡亂去賭，短線可能贏可能輸，但長線必輸。為何短線可能贏？若果踫啱（不是散戶估中）真係有大波幅，同時買牛熊證就會贏，這種叫做「棍中」；為何長線必輸，你都唔係用理性的態度去炒，長線點可以鬥得贏發行商？俾你贏一次，兩次，最後你都會輸番哂。

當然散戶也可以話，我唔係賭得咁高章，只係炒吓上落，同時買入牛證和熊證，股市跌先沽熊證，到升番又沽牛證，賺少少差價而矣。但窩輪和期權都有時間值，少少差價都唔易賺，反應一唔夠快，就會錯過沽貨時機，唔係咁易兩邊賺，衰起上來可以兩邊都沽唔切。作為窩輪買家，第一好難長揸（除非做對沖），第二若買入後大市發展唔符合原先所作的理性假設，就要馬上離場。用上面的例子，同時買入價外的牛證和熊證，等如買入勒束式期權，賭緊有大波幅，如果過十日八日大市仍然無乜波動，唔係太對路，就要馬上清倉離場。

若果你矇查查同時揸入牛證和熊證，原因只是你不明大市走向，都月底大市仍然唔上唔落，牛牛皮皮，狀況和你原先買入的狀況接近，你兩邊都無沽，同時可能沒有太多危險的感覺，你根本唔知道牛皮市就係殺死勒束式期權的最差市況！呢啲就叫做唔識炒就亂炒啦，窩輪有時間值，期近結算的窩輪時間值減值的感覺愈快，你唔覺意坐佢十日、八日，可能已唔見２０、３０％，你更加唔想走，最後就可能輸清收場。

窩輪如期權，背後的理論好深奧，你唔明最好少賭。若然想再賭，用一個「結果決定」的方式檢討一下，過去炒窩炒咁耐，唔理你用乜方法乜理念，先計一計累積有無賺錢，如果累積有賺，可以繼續炒，如果累積要輸錢，證明你未到家，就少賭為妙。低價買入好股，唔揸長都揸佢三、幾個月，可能較易贏錢也。
陸羽仁

炒波幅（３）
我相信大部份在股市短炒的朋友，都在捕捉大市或個別股票的短波幅，希望走一轉，賺點錢。

我經常話炒波幅難賺錢，早兩日的命題是「你對炒作的工具理解咁少，點可以利用佢嚟賺錢呢？」你唔了解窩輪背後期權運作的原理，的確好難炒輪賺錢。

今日再講另一個題材：對手，對手太強時，你好難賺錢。你唔知你炒緊波幅時，好多時同緊大戶、大鱷做對手，你當然輸多贏少啦，因為大戶就係製造這些短線波幅來搵食，你入去想搵嘢食，自己就變成人地的食物。

賭錢也好，賭股票也好，賭任何嘢輸錢，輸兩樣嘢，第一輸抽水，如果開賭檔者抽水，呢個抽水者一定贏，四個人在一間士多租枱打麻雀，士多抽水，士多永遠贏。第二輸對手，據職業賭徒統計，在拉斯維加斯賭場的賭枱，七個人在同一張枱賭百家樂，大約有２個係職業賭徒，２個係半職業，仲有３個係遊客，對手有強弱，在呢個環境，當然多數係遊客輸。

以賭馬為例，以前先由政府抽稅和馬會抽水，兩者先抽去３０％（而家政府改為抽馬會利得稅，複雜少少），餘下的７０％才是彩池，即係未賭先輸３０％抽水，然後賭客中有大量職業賭博集團在香港馬場搵食，結果是散戶賭客和職業集團爭逐餘下７０％的彩池，等如細路仔同空手道黑帶五段打交，結果可想而知，職業集團在被人抽水３０％的前題下仍能贏錢，散戶賭客的處理當然惡劣到極。

股市抽水不多，印花稅和經紀佣都有限，賭股票主要輸對手，股市對手超強，全地球最高智慧的生物都集中在股市內，你去炒波幅，就係同佢地做對手。

網友均兒提到她和大陸妹妹炒A股的經驗，就是一個活生生的例子。均兒咁話：「人的運氣可遇不可求，即話貪心求勝多數輸收埸。（去年）我自己有一個預感，估人民幣會升值，如果當時我存定期一年好似係4.27厘，即一年20萬有8仟幾元利息，加上升值，一年的回報真係好和味。但係我貪心，心想放喺銀行不如買地A股，幾年后又可以再翻倍哦。跟住就向鄉下個妹妹學大智慧，又飛回去借咗鄉下個哥哥的戶口，分散買左三隻A股，中國人壽601628平均價係56元（人民幣，下同），佔60%，中鐵601390平均價10.6元，佔30%，廣深鐵路601333平均價9元，佔１0%。當時我覺得組合好靚，10%廣深用來短炒，佢平時好呆，但正值過年前春運期，期望佢炒一波，結果美夢好快變惡夢，春運碰上大雪災，我係大陸股市5000點時買落的A股，好像吃咗瀉藥，一瀉不止。其實我個妹妹炒波段好叻，破咗5000點佢叫我止蝕，我係都唔制，重同佢講道理，話我要長線，好像巴菲特咁。我妹罵我神經病，破咗4000時，我個妹日日打電話來吵，我一於泰山壓頂不彎腰，不理她。結果還是不停的跌，此時己跌到我心慌慌。」

「其實我不是很緊，相信最多守返兩年又可以見返家鄉，但鄉下人唔同，話我回去炒股票輸大錢。我個妹愛面子又唔抵得，日日吵到我頭痛，話現在一定是底部了叫我回去補貨，把成本拉低，於是上個月八號風球那天我匯了二萬元回去，但我叫個妹買招商銀行。這次好好彩，那個星期一30元邊買到招銀，第二日即刻降印花稅，我幾開心呀。係QQ見到妹，我重未開口，佢即刻話：我放了，32.5元放了。我當時哦到出唔到聲，唉！佢話有大小非，會再跌，我叫佢再跌也買招銀，結果她又在34元買，32元放，這次波幅輸咗，跟住又系31元多買入，話這次不會輸哦，因為這次我話由佢做主，費事佢來吵我。」

「炒波段30元買32元放，贏。34元買32元放，輸。再31.5買以後未知。如果30元買唔放依家都係32元。想返如果當時存人民幣唔知幾好，或者喺珠海買層樓重好過，但喺人身歷其境時，你根本唔知以後形勢變化會點，人係沒早知，如果有早知，早已富可敵國了。」

均兒和佢個妹係兩種典型，均兒高位買貨死揸，佢個妹妹出出入入炒波幅，兩個炒股都有不同的死法。以均兒的例子，高位買，急插唔止蝕，會輸到入肉，長線投資者唔應該喺高位買貨，倒轉來講，喺高位買貨唔可以話自己係長線投資者死揸唔放。

不過均兒的妹妹更是典型中的典型，這是最爛炒的型態，也是經常炒作散戶中的最大族群，他們自以為是老手，短買短放，出出入入，時贏時輸，花了半生時間在股市，叻少少啲一場白做，無乜贏輸，差少少的經常出血，但輸極都唔怕。這種散戶只有在大升市時才能賺錢，好似去年９月、１０月的市況，由於股市急促向上，散戶盲目入市短炒都經常有水執，所以這種市況，也是散戶最「牛」的時候。但你要問，若散戶日日贏錢，咁邊個輸錢呢？

正如我所謂，股市有大戶，他們是散戶的對手，香港有外資，大陸也有大戶，傳說大陸有間大保險公司，預知宏調就快殺到，在大陸股市５０００點、６０００點時做了「空軍一號」，大手沽貨，最後獲鉅利，當大陸散戶大買特買時，就係同呢類空軍一號對賭，大陸的市場最受政策影響，大戶掌政策走向，財雄勢大，散戶和他們賭，結果可想而知。散戶平時炒波幅，炒上落，每次俾大戶抽少少水，積少成多，計埋已經輸唔少。到股市大升時，散戶博命落注，更是一舖俾大戶抽大水，輸身家。

你想炒股賺錢，就要照吓鏡，睇吓自己有無咁o既智慧和EQ，唔係去打贏大戶，而係跟佢車邊，殘殺其他散戶，食番少少餸頭餸尾。


陸羽仁

炒波幅（４）
美股跌完再急跌，昨日因為聯儲局公布早前議息會議紀錄，顯示聯儲局不會再減息，加上油價再急升，令人擔心通脹上升，影響經濟增長，道指再急跌２２７點，跌幅１．８％，收報１２６０１點，險守１２６００點大關，看來港股又要先捱一捱沽了。

我早兩日講到，「你想炒股賺錢，就要照吓鏡，睇吓自己有無咁o既智慧和EQ，唔係去打贏大戶，而係跟佢車邊，殘殺其他散戶，食番少少餸頭餸尾。」


呢句說話引起不少迴嚮，經紀張炒股三十年，都算有啲斬獲，佢話自己贏錢時經常講，「睇吓我幾掂，連大戶都砌低呀！」直至到睇完我篇文，先知道自己贏錢時，只係砌低散戶，唔係砌低大戶。


我笑經紀張，「你玩咗幾十年都唔知？當局者迷啦。你邊可以砌低大戶呀，你睇美國排頭位的大行，季季賺大錢，直至最近才衰在自己製作兼推銷的次按證券手上；你睇美國排頭位的對沖基金，亦係年年執大水，大戶絕大部份時間贏大錢，要輸都係散戶輸，有一個散戶贏，就有更多散戶輸。你入賭場賭錢，咁好彩贏錢走，唔係賭場輸俾你，係其他散客輸俾你，賭場經營幾十年，你賭一舖可以好好彩贏到佢，賭１００舖賭場已經差唔多贏梗，宏觀啲講，賭場一定係最後勝利者，你偶然賭幾舖贏吓，都係贏到隔籬嗰個賭客啫。」
　　
散戶入場炒股，第一個心態就應該知自已渺小，知道對手巨大，但偏偏好多散戶唔知，將自己放到好大，以為自己經常睇得啱。著名投資人彼得林治(Peter Lynch)在《One Up on Wall Street》一書中，亦講到股市投資者常犯毛病，就係相信自己對股票的直覺，覺得自己有感知股票升跌的秘技，他們有時會強烈覺得某隻股票會升，但事實正好相反，買入之後無幾耐隻股就跌。這並不是因為股民特別愚蠢，而是因為他們感知那些令股市升跌的訊息時，已經太遲，那些訊息已充份、甚至過份擴散，到他們按訊息買入時，已是水尾，甚至是相反走勢的開始（P.81）。
　　
　　網友mocha早兩日問的一個問題，亦反映了投資者的自我過大，佢問：「陸 Sir：網龍 8288 公佈零八年第一季業績，收益明顯比對上兩季下跌，所以股價應聲下跌，但跟據其業績報告，網龍將於五月低納入 MSCI 中國指數成份股，而且，今年第二季將會陸續有多款新 game 推出巿場，預計帶來滿意收益。」


「現在，我所考慮既問題是：
1. 季度業績報告只是輕輕一句說五月低會納入 MSCI 中國指數成份股，可信性有幾多呢？
2. 由於早前我對網龍滿有信心，可惜，呢一季出現不理想業績，不過仍處於盈利階段，令我相當矛盾，若然沽貨離場，便等如承認睇錯巿，唔能夠過自己心魔一關。
3. 還是，我應該學習股神巴菲特一樣，價值投資，因為我仍深信中國網絡遊戲巿場仍有無限增長潛力。」


　　我對網龍無深入研究，我唔知網龍得唔得，只想講講Mocha的心態一定唔得。佢嗰句「若然沽貨離場，便等如承認自己錯誤，唔能夠過自己心魔一關。」我真係要勸Mocha一句，如果唔想沽貨離場的原因係唔想承認錯誤，你以後都唔好買股啦，買股以自己為中心，死十次都未夠，不如月供盈富基金算啦。你呢種唔認錯的心態，一葉障目，一塊樹葉就遮住你睇全世界，要戒。


　　陸羽仁認為，自己的觀點，睇啱時有價值，睇錯時一啲價值都無，假設自己七成睇啱，三成睇錯，睇啱時堅持，要賺多啲，睇錯時半點都不用堅持，轉得快，好世界，要即刻認錯，要即刻斬，甚至反手做，咁就輸可以輸得少，贏得多輸得少，最後加加埋埋就會贏。人的Ego（自我）一個仙都唔值，唔值得堅持。


　　但在現實生活裏，問誰能做到？結果大多數人只係「輸就谷，贏就縮」，輸時堅持己見，錯上加錯，見跌溝淡，接到成手貨。贏時就騰騰雞雞，因為平時唔係贏咁多，唔敢去贏，只想保持這個寶貴的勝出經驗，四圍同人分享，所以贏少少就離場，錯過食大茶飯的機會。


　　好多散戶想在股市炒炒吓搵食，但現實上，先輸方法，再輸對手，三輸EQ，無大戶的EQ，點扯住大戶的衫尾搵食呀？

陸羽仁



炒波幅（５）

美股大跌兩日後定番啲，道指全日三次試１２６００點大關，但都守得住，收市報１２６２５點，微升升２４點，升幅０．２％，在外圍穩定番啲的情勢下，港股亦應該企番穩少少。

　　股民性好炒炒吓，想在股市的上落波動中賺錢，不知不覺間做了大戶的對手，和強手對壘而不自知，仲被對手不斷咁玩，不斷咁考驗自己的EQ。

　　網友twohitsix早前講到自己投資的「升學」經驗，「當我還是(投資)BB班既時候，我信朋友講既貼士，科網熱時身在美國，買JDSU, YAHOO, 結果---衰哂。」

「當我讀幼稚園既時候，睇報紙D專家講MACD, RSI, 四浪背馳，十二轉勢，好PRO. 跟買---衰哂。」

「當我讀小學既時候，自己睇MACD,自己睇RSI，炒保歷加通道，結果RSI 20買，跟手變 8 (你冇睇錯，係RSI 8!)，又係衰哂。」

「當我讀中學既時候，炒期權，收時間值，沽CALL沽PUT，6000點上下波幅都有得贏，加埋對沖，唔駛死啦，結果...死係GAP UP/GAP DOWN。」

「而家讀大學，睇陸SIR BLOG，先知少數人操縱世界，當我的對手係獅子老虎，我只係隻一拍就散o既老鼠。不過我呢隻老鼠食過肉，有兇性，而家識得咬其他老鼠。重有，我以為我讀緊大學，原來我只係咗升一級...而家最多係小學五年級。」

　　陸羽仁睇完twohitsix呢段反省，感慨良多，一般初級老散，睇吓報紙、電視，抄低冧巴，聽吓經紀推介，就形成自己對大市或個別股票的看法，瞓身入市，堅持自己的看法，為自己信念奮戰，結果大部份戰死沙場，這一批就是股市的幼稚園生。
　　
　　好啦，大家炒股炒耐咗，慢慢發現做幼稚園生好易死，就像提高自己的水平，好多人想去升小學，唔想再單憑感覺，開始好似twohitsix那樣，想搵番啲技術分析工具來幫助自己。

　　我經常講，市場上的投機家多數想搵一件比別人優勝的測市工具，打敗市場，這也是散戶的夢想。不過我諗一般的技術分析工具，肯定無咁o既功效，你信技術工具信到十足，完全用哂市面流行的技術工具指導自己出入市，我估十個有七、八個都唔掂，唔掂的原因亦都好簡單，好似美國股市咁大o既市場，相對無咁易操控，技術分析的作用會大好多，但香港的市場太細，好易被外資大鱷操控，大鱷睇住某些流行的技術指標，造些假訊號，好易就騙到散戶落叠。

　　陸羽仁有個朋友，在某外資大行做基層員工，有一個坐盤炒作部門的老細行過見佢睇住個大市走勢圖，研究技術指標，老細哈哈大笑，話「唔好信呢啲技術指標啦，香港個市咁細，港股個圖係我地劃出來o架！」朋友話外資大戶在月頭已諗好港股「應該」點走，部署好期指的倉位，然後就按個圖去做，升幾多要回，計好回到乜嘢深度，才可以嚇到散戶腳軟，然後又點樣炒番上去，月尾期指結算時又執水。

　　大戶做的事情，住住是對股民EQ的最大考驗，你順住個圖去玩，經常會買中一段，當你滿心歡喜時，好快又走向逆境，大市住住打穿重大的止蝕位，插到你頂唔順，（或升到你頂唔順），逼散戶止蝕，當你地舉手投降後，大戶才施施在低位吸番貨，慢慢炒番上去。你可能話我捱吓應該得，但大戶玩期指，倉位大，又數到倉，知道散戶做緊乜，就等如賭場可以開埋你隻底牌來睇，然後不斷咁大你，嚇到你棄牌投降為止，根本就係睇住嚟食，所以散戶好難有咁高EQ，頂得住咁嚴峻的挑戰。

較好的策略是期望自己能站到大戶那一邊，當人人都覺得要買時，自己唔好買，相反無人敢買時，自己就去買。舉個例，好多人話跌穿２５０日平均線就係牛熊分界線，跌穿就要清貨咁話，你喺香港咁做，十次有九次都係在低位出哂貨，因為好多時大戶就係專登插穿２５０日線，等大市出現恐慌，散戶不問價出貨時，佢地才施施然入市掃平貨。所以我話你買股之後唔對路，跌到止蝕位，跌到５０日線、１００日線就要快快斬，然後等跌市，到跌穿２５０日線時，就升而可以投機性吸納了。倒過來說，升市的道理也是如此，點解回吐前通常出現雙頂？因為第二次上高位時，好似會升穿高位，似破位向上，會吸引好多散戶追貨，就係大戶出貨的最好時機。

　　網友可能會問，陸羽仁你都會講到一些技術位，點解你自己唔信又去講？老老實實，我睇呢啲技術指標，會附加一副有色眼鏡去睇，諗吓大戶造出這些指標，到底有何用處，然後觀察市況，去驗證先前的假設啱唔啱。

　　你學咗技術指標，讀完小學，依住教科書講o既嘢去瞓身入市，雖然好過幼稚園生，但一樣會死。我有時覺得，讀大學讀完財經學位，睇市未必有用，反而讀心理學可能會啱用啲，大戶就係捉散戶心理，散戶亦都明，問題係唔知點解，明知係咁，但卻偏偏躲不過。

陸羽仁


炒波幅（６）
散戶去賭錢，去炒股，永遠都在想一些必勝術，但你可能不知道，這些必勝術已經經過千千萬萬人研究過，答案是單個個人去賭場賭錢，係沒有必勝術，必贏的是機率佔優的賭場，然後會贏的也是玩機率的賭博集團，賭博集團係在機率缺陷下，仍然能在賭場（及馬場）嬴錢。

　　網友Kanas112去澳門，佢平時無賭錢，首次賭就嘗試找一些「方法」，他玩骰寶，用的方法是留意過去３、４舖沒有開的結果，然後去買，例如過去４舖開細，就買大，一舖唔中，加注再買，買到贏為止，他認為自己有機率優勢，因為開了４舖細之後，連開５舖、甚至６舖細的機率已經很小。

　　網友Wacko指出，這是典型的賭徒謬誤，以為每一舖的機率是有相關的。無錯，你未賭之前問，連開５舖細的機會率有多大？假設一舖開細的機率為０．５（實際上加埋開全骰真正買中率會略低於０．５），五舖都開細的合共機率是０．０３１２５，即係一百次只有３．１２５次會出現咁結果。但現實上每一舖是獨立的，無論你在連開４舖細之後買細，或者連開４舖細之後買大，機率同樣是０．５，不會話當時買大的機率，優勝過平時的機率。

　　Kanas112話用７００元贏了５０００元，很高興，真正令他贏的是輸時加注手法，但這個手法可以令人一般地贏，但最後輸一舖就輸身家。我聽過一個例子，有個富豪和朋友「鋤大D」，每輸一舖加注雙倍，由於是私人賭局，可以無限加注，點知佢連輸了２０幾舖，輸到過千萬，佢決定放棄，因為再賭落去，真係咁黑輸多１０舖８舖，佢可以成副身家一晚輸哂，賭博之害就是如此。記住最爛賭之人，都唔會覺得自己亂賭，都覺得自己有套方法，問題係嗰套方法唔得而矣。
　　
　　Kanas112，信我啦，你講那個方法我研究過，唔係幾得。在我細細個時，阿媽過年和我們小朋友玩啤牌「三公」（平日不准賭錢，過年例外），我阿媽就係用呢種手法，大烚細，佢輸咗就加注，結果贏哂我地幾個小朋友，不過我大個後就知道呢種手法唔得。你贏一次錢，信咗佢得，愈賭愈多，不能自拔，最後一舖輸獲甘。

　　去賭場賭，證實咗得的賭法是用記牌方式賭２１點，一個集團有７、８個人，大部份是記牌員，有１、２個下注的狙擊手，例如６個人分開６張枱記牌，他們有一套方法，記下出大牌的數目，例如出一隻大牌就加幾多分，出一隻細牌又減幾多分，當餘數大到某一個水平時，就知道大牌出得七七八八，出現機率有利時刻，記牌員會暗中通知狙擊手到那張賭枱去賭，咁賭法都會有贏有輸，但由於機率佔優，長賭必贏，在機率佔優時，賭得愈大，贏得愈多。所以賭場一發現有賭博集團在運作，就馬上把他們記入黑名單，不讓他們再入場。

　　炒股講方法，錯誤的方法，唔會帶你到正確的目的地，散戶炒炒吓，好多時也用了似是而非的方法，上述講賭輸加注的方法，就等如買股輸咗加注溝淡，加注後博佢升番，就可以脫身，問題是溝咗一次得，就次次去溝，終於有一次溝著隻永不超生的雞股，一舖輸身家。

　　我有時聽收音機，聽到一些７０、８０歲阿婆話自己買咗啲熱門股，隻股炒完插咗落去，問主持人名咀點算，名咀就叫佢不妨溝吓，或者個主持人覺得隻股衰一排會再炒過，但係我心諗，你叫阿婆去溝，阿婆光陰有限，會唔會等唔到隻嘢升呢？況且大家見過曾經是大藍籌的電盈（００００８）永不超生，就知道無乜股溝貨一定唔會死。

　　正確方法是買股唔順手時，要減持而非增持，贏錢時加注，輸錢時減注，係最簡單的道理，炒股也好，賭錢也好，要講方法，可惜散戶大多數掌握唔到正確的方法。

陸羽仁