李小加睇A股 最安全變最危險

中環在線：李小加睇A股
最安全變最危險 

 

股災前，港交所（388）行政總裁李小加講過，「A股是全世界最扁平、最透明、最安全的市場」，股災之後成日俾人笑，佢仲特登寫篇Blog解畫。噚日佢就 喺論壇致辭時正式改口，提醒投資者「有時，A股可能係最危險嘅市場」。
小加喺紐約讀法學博士，又喺當地律師行執業，月底倒數新年，時代廣場年年都聚集成百萬人倒數，小加比喻為國際市場，雖然人多，但人流管制做得好，「入場時分為唔同小圈，由警察看守分隔」，經紀、基金等照顧客戶，「咁多年嚟都冇試過出意外」。
內地市場以散戶為主，如「100萬人喺廣場上，冇經紀、冇機構監察制衡，好唔穩定，如果有人大嗌，就會有人開始跑，有人跌低，可能會人踩人！」最安全嘅地方先係最危險，小加似係古龍上身喎。

李華華