收市閒情：港鐵晉身「愛國愛黨」企業

高鐵呢單嘢，係完完全全世紀大騙案，政府、港鐵（066）、股東、小市民，冇一個係贏家！唯一贏家係邊個？就係中國政府。高鐵會唔會爛尾冇人知（不過中國政府、港府、民建聯應該唔會畀呢件事發生），但可以講嘅係，港鐵應該係香港有史以來第一間港資上市公司，為成就「中國大一統基業」，不惜斷送公司前途、搵小股東陪葬嘅上市公司。港鐵，仲唔快啲上京領賞？
學曾志偉話齋，「一將功成萬骨枯」。高鐵香港段，26公里，由西九龍一路向北，直達深圳，連接國家延綿16,000公里高速鐵路網絡。起咗之後，仲可以搞埋「一地兩檢」，將香港大門打開，迎接偉大嘅中國軍官將領！嘩！香港能夠參與中國偉大豐功偉業，當然謝主隆恩，貼錢參與。
哈！你一落搭就跌入無間地獄！我問你，你聽到高鐵超支、delay幾多次？一、二、三，答唔出！因為真係太多。好啦，今次港府計咁耐，終於計到起高鐵超支194億元，個窿黑洞咁大，點填？爛尾？傻的嗎？那是完成「中國夢」，邊有得停！問題係，哪有錢？
咁情況就好似年輕人上車，發現搞唔掂首期，最後返去求屋企人俾，輕鬆完成一個勵志上車故事。不過今次港府唔係「成功靠父幹」，家陣係個仔為完成阿爺心願，走出去同老婆仔女講，我分身家畀你哋，但你哋要同我一齊借大耳窿，之後有錢齊齊還，一家人，一條心！（咁似丁蟹嘅？）所以港鐵今次搞場派息大龍鳳，派195 億元畀政府。

左手交右手，政府庫房唔止冇少到，仲有微賺！可憐港鐵小股東，表面係就係收咗每股4.4元甜頭，但係呢4.4元，係借貴利借返嚟！你估真係「易借易還唔使還」？借錢係要畀利息！加埋美國好快就加息，你話冇影響公司財務表現？邊個信？
當初政府說起高鐵，吹到有咁大得咁大，講到經濟利益有幾勁，唔起香港會死咁樣。不過到底有幾大經濟效益？一地兩檢點搞？全部得個吹字。家陣超支兼delay，要N年先回到本。不過，作為中華人民共和國的好兒女，為了中國，要你為國捐軀，都要啦！
中國公司自古以來，有邊間唔係以國家為先？君不見中國股災之時，所有券商係要真金白銀畀錢掃貨，為咗成全中國夢，就算明知蝕入肉都要含淚入市。要知道，所有大型券商都係有上市。喂！你咁使法對得住小股東？唔好玩啦，中國股市嘅玩法係，國家第一，管理層自己第二，公司第三……小股東你死你事！
港鐵由於係政府做大股東，所以就更易辦事。港鐵於是就好似當日「捨身救國」嘅券商咁，成為香港第一間因為「愛國」，不惜犧牲小股東利益嘅上市公司。小散戶，為咗實現中國所想打造的「珠三角一小時生活圈」，將中國後門打開直通香港心臟，你哋要墊屍底係無可避免，硬食啦！而且你哋係第一批買港資上市公司股東，親身感受國企嘅上市文化，應該要講萬歲萬歲萬萬歲啦！今次先例一開，香港以後真係富貴又榮華啦！
P.S.想當日多間有加入「救市國家隊」嘅券商，包括主力最大券商中信證券（6030）、國信證券等，因涉違規被立案調查。

by千頌C@堆填區
http://fb.com/winbigwok