香港寫真集 : 小股東當炮灰

數字遊戲：小股東當炮灰 

 

高鐵是否政治工程有排拗，但肯肯定是政治炸彈，工程倘爛尾唔只無得向阿爺交代，仲要留低個爛攤子，全香港人篤眼篤鼻，就算千億造價都要頂落去。本來仲扯緊 貓尾的港府與港鐵（066）結果咪又要乖乖坐低玩數字遊戲，用財技掏空港鐵填氹，呢單刁嘅關鍵，係政府同港鐵夾埋諗條橋想過骨，但舉手過關嘅係小股東，而 枱面放嘅賭注係港鐵股價……您話嘞，做人點可能政治中立？
有意見話呢單刁是港府、港鐵同小股東三輸局面，姑勿論港鐵是否會碌爆卡自我犧牲收場，政府封頂、抑或港鐵找尾數，講到尾條數唔係股東埋單、就係納稅人找數，如港鐵股價無運行是強積金供款人的事、轉吓手要加票價就更加係每日500萬人次乘客的事，輸的從來都是小市民。
雖 然議案通過的另一前設是立法會批准，但今時今日應該沒有香港人會對通過有懸念，唯一變數只在港鐵股東。港鐵對上一次大型特別股東會投票，要數07年兩鐵合 併，當時持股77.5%的港府同樣放棄表決權，餘下22.5%持股股東中，只有約兩成或5%股權投資者投票，當中超過八成贊成，被指是「一小撮人決定的命 運」。無錯，投資市場向來是有強姦無焗賭的世界，小股東不滿意可以沽貨離場，但今次是政治事件由投資者解決，目的是逼人表態兼無仇報，港鐵小股東反對或贊 成自己有定論，但無論如何，企出來用票抗衡才是最有力。

大家身處一個弱勢但又要專橫的政權底下，都不希望歪理當正義、無投票股東被代表、負面顧問報告變正面、甚至是愛國愛港大媽股東湧現的情況出現。好似好荒謬？但有邊樣係近年大家見得少嘅？

林靜
本欄逢周四刊出