【名家搶先睇】衰過87股災危機（魏力）

相信今日所有專欄都會講英國脫歐，但無辦法，影響實在太深遠，點都要寫一寫。誠哥在公投前說，脫歐不是世界末日，但會削減英國投資。公投後，格林斯潘說，脫歐只是冰山一角，是他印象中最惡劣的時刻，前所未見，比1987年大冧市更嚴重。

脫歐最大鑊之處，在於前所未見，基於人類防衛意識，首先一定偏向負面，認為其他國家會跟住搞公投，歐盟四分五裂，歐元崩潰，玩完。格老的冰山一角論可能望得很遠、很前瞻，但英國距離真正脫歐至少仍有2 年，即使要演化至歐盟解體，隨時是5至10年的事，加上歐盟必會盡力保住頭家，呢場大龍鳳有排玩，但炒股唔使諗太遠。短期個市定會再跌，但這不會是雷曼式、流動性枯竭式崩盤；反之，全球市場又好、歐盟其他成員國都好，都會睇實英國點同歐盟討價還價，以及未來英國經濟狀況，再逐步price-in番落股價，這會是漫長的過程，雖不是世界末日，但未來幾年有排捱。另一頗肯定的是，耶倫又多個藉口唔加息收水，至少大選前唔使諗，等買平樓的人或要再等一會，貴金屬則睇高一線。
魏力