Money Walker：兩個見底訊號未見影

恒指失守二萬二，不過大家最希望見到嘅唔係呢啲陰跌，而係痛快地來一場暴跌，因為大跌意味住港股進入熊市三期，亦代表住見底反彈嘅一天就快來到。不過等呢一日真係需要耐性，恒指月線圖配合埋技術指標MACD嚟睇，發覺大市兩個見底前後會有嘅迹象都未出現。恒指過往廿年有三次跌市，三次見底回升嘅時間，分別係喺1998、2003同2009年，每次見底前後，MACD都會先後出現兩個訊號。
第一個訊號係MACD線同EMA線同時低於零，即處於所謂嘅「熊區」，呢個訊號可能會喺恒指見底前或見底時出現；第二個訊號就係喺恒指見底後先出現，呢個俗稱「熊牛」嘅訊號，意指MACD線升穿EMA線。只要見到 MACD線出現上述兩訊號，就可確認恒指真正見底。咁第一個訊號，即MACD線同EMA線跌至「熊區」，出現未呢？MACD線今年5月見頂回落，EMA線就喺7月至見頂回落，但MACD線上月先跌穿零進入「熊區」，而EMA線就暫時都仲未失守零。
至於第二個訊號，即MACD線升穿EMA線，就更加唔使諗住，因為第二個訊號要喺第一個訊號出現後先會出現。而且MACD線升穿EMA線前，理應會見到MACD線由跌轉升，但睇返恒指月線圖，MACD線至今仲跌緊。
MACD用來確認恒指見底的確十分準確，但卻有所滯後，往往要恒指見底後一段時間，MACD線先會升穿EMA線。之但係，既然上述提及第一個見底訊號，即 MACD線同EMA線均處於「熊區」，都仲未出現。大家要估恒指見底時間，就要密切留意EMA線幾時跌入「熊區」，同埋MACD線幾時先由跌轉升，並向住 EMA線進發喇。

El.
本欄逢周二、四、五刊出