人民幣究竟跌夠未

 Money Walker：人民幣究竟跌夠未

有睇開財經新聞嘅朋友，相信會發覺呢幾日關於人民幣嘅新聞老是常出現，其實人民幣究竟跌夠未？幾時先可以畀大家唞唞？
簡單嘅答案係「未」，詳細版嘅答案都有一個。唔知大家有冇聽過「三元悖論」呢個理論，個理論唔深，只係話資本自由流動、固定滙率，同埋貨幣政策自主性，三者不能並存，一個國家只能喺入面三揀二，如果貪心長期都揀晒三樣，遲早會爆炸。
舉個實例大家就明，1997年嘅泰國，當年泰銖同美元一直實施固定滙率，但因經濟放緩，大鱷估計泰國無法維持固定滙率，紛紛對其狙擊。喺資本大舉外流下，泰國不但實施資本管制阻止走資，又加息試圖紓緩走資情況，結果因為幾乎耗盡外儲，泰國被迫放棄固定滙率。
同 一情況隨時喺鄰近香港嘅經濟強國上演，中國要同時追求人民幣國際化，又要維持寬鬆幣策以刺激經濟，就無法保持人民幣滙率穩定。人民幣呢幾日陰跌，就證明中 國自己都明白，唔想重演泰國17年前嘅悲劇，就一定要容許人民幣逐啲逐啲咁跌。而且人行一定要小心拿捏人民幣貶值嘅速度，事關唔貶值會耗盡外儲，貶得太快 又會觸發恐慌性拋售。
人民幣逐啲逐啲咁貶，意味住關於人民幣嘅新聞，一定會繼續長期出現。話時話，人民幣零售國債就快截止認購，買唔買得過，標準答案亦只有一個，就係如果手上有人民幣就認購，手上冇嘅話，當然就要留返個錢，等其他已經就見底嘅貨幣回升。
至於其他長揸人民幣者，則要有心理準備最少坐幾年艇，等待中國經濟由放緩變成復蘇嘅一日。

El.
本欄逢周二、四、五刊出