睇吓鮮：黑色星期一殺到？

每逢危難事故發生，清晰逃生指示隨時可以幫你拾回一命。由香港雨傘革命、非洲伊波拉病毒至歐洲經濟再面臨衰退等，市場最擔心27年前嘅全球股災「黑色星期一」，有冇機會重臨。
商 品大王羅傑斯上星期話睇淡美股前景，美股牛市終結，又好認同大淡友法興分析師Albert Edwards的話：「係時候沽晒所有貨，緊急逃生！」道指近日失守萬七關，跌落萬六點水平；標普500指數亦跟跌，兩隻指數連跌四周，係2011年以來 最長跌浪。羅傑斯認為美股升市玩完，全因聯儲局月底收水。聯儲局金融海嘯後開機印銀紙，代價沉重，影響過去六年來大家嘅儲蓄同投資。IMF同世銀聯合年會 亦以「失望」總結各國喺金融海嘯後推出嘅救市策略。
投資者要自備股災救生包，緊急情況下都能減低損失，最好就係重溫大師智理明言。富蘭克林鄧普頓 旗下Mutual Series基金總裁講過市況混亂就要保持冷靜，尤其情況突變，冇人可以保證所有決定係啱，冷靜頭腦可確保投資組合捱得住。股神畢菲特嘅名言亦值得重溫： 「別人恐慌時我貪婪。」逆市進場。美國獨立投資者聯會發現，1987年股災後一年，美股藍籌股回升12%，兩年後更累升22%。統計學家Ted Aronson計出，1987年股災嘅出現機率好低，近乎冇可能發生，但股災最後都發生咗。大家要接受世界上冇嘢係冇可能。

C+B
本欄逢周一刊出