賭仔好快賴地硬

青心直說：賭仔好快賴地硬

2012年05月04日

投資者心水清、視野闊，會發現美股道指現水平距離歷史高點 14198點，原來只是 6.5%之遙，香港呢？恒指現水平卻仍距離 31958點歷史高峯 33%，真係唔爭氣，資金情願過大西洋炒美股，難怪港股成交奀過奀豬！
道 指強唔好賴隻蘋果，因為隻蘋果甚至谷歌，都仍然未晉身道指成份股，而標普則仍然與歷史高位有 11%落差。在美國上市的 IBM、麥當勞（ MCD）及迪士尼（ DIS）都創了新高，不是成份股，卻持有必勝客、 KFC的 Yum！ Brands（ YUM）及 BB奶粉股美贊臣（ MJN），近期亦通通創新高，就算係指數內的可口可樂（ KO）、強生（ JNJ）及寶潔（ PG），亦出現將要破頂創新高之勢。以上種種盡皆大家耳熟能詳的內需品牌，共通點是已成功開拓內地市場兼賺到笑。
反觀香港股市，近期個別本地成功 得道創新高股份如恒安國際（ 1044）、旺旺（ 151）、統一（ 220），亦通通都離不開內需概念。不要拿百貨珠寶金飾與鐘錶股比較，大家都份屬內需，但後者風光過後近期有點傷，必需消費品與非必需消費品，在內需概念 上分別好明顯，前者近期後發先至，不無理由。

過江龍大多孭重債

可有留意，近年成功被遊說來香港上市的 跨國企業如俄鋁（ 486）、普拉達（ 1913）、新秀麗（ 1910）、嘉能可（ 805），共通點雖也離不開內需，可是卻也通通係重負債股份，過江龍明顯也不是省油的燈，貪香港靚仔乎？說穿了，又係貪香港集資能力強，公仔紙隨時有價有 市。
大家唔見麥當勞會揀來香港第二上市，人家手頭現金多，現金流又強，有息派，點解要益外人？香港地，賭仔入市以為買大細，習慣成自然，冇得救！看！過多兩個禮拜即 5月 21日，秋官套劇《心戰》在電視播影時，又有幾多人會走出來賴「秋官效應」發功！倒不如賴地硬可也！

胡孟青
獨立股評人