曾爵士如何埋炸彈害人

  金手指：曾爵士如何埋炸彈害人

2012年02月02日

當 年差幾日就要宣誓效忠人民共和國嘅曾蔭權，真係冇被揀錯跪喺查理斯面前，效忠英女皇、誓保大英帝國之餘，仲被冊封為爵士。因為淨係睇佢話事卸任前，財政司 司長曾俊華最後一份財政預算案，就見到曾蔭權貫徹始終大英帝國施政宗旨，就係臨拍拍屁股走前，幫接任嗰個埋下拆唔晒嘅炸彈。時辰一到，炸到下手眼坦坦。
點解孫柏文會咁講？不如就跟住呢份財政預算案內嘅次序，慢慢睇。首先，預算案內講話要送錢俾生意佬， Oh sorry I mean「支援企業」。方法係點？咪就係我上一篇《金手指》嚴重警告話唔好搞嘅政府做擔保。
點 做？就係「支持政府企業」去銀行每借 100元，官就用我哋啲血汗錢做擔保，保足 80蚊。政府收嘅保險費，只係利息嘅百分之十。有班被差佬用支槍指住頭嘅納稅人做，銀行仲唔個個放水？不過我有冇得借呀？冇。不過有人走數時，還就有我份 還。仲有，居然話係畀「中小企」。嗰啲日日叫你利得稅分「稅階」嘅人聽到，就會問：「你話唔可以推行利得稅分稅階嘅原因，係因為啲人可將大公司重組成好多 個小公司避稅，所以無法知對方究竟係咩規模。家又可咬牙切齒咁認定邊個係中小企，再利益轉移？」佢哋如果咁問，我就只會話，唐英年，你最好諗定點答。
官 仲話根據佢哋壞賬率計算，擔保 1000億元，要納稅人輸 110億元。點計呢？其實政府咁講，唔係對我哋呢啲納稅人講，因為計錯政府要輸更多俾銀行時，我哋連聲都唔可以出，淨係被當提款機咁㩒，頂多落滙豐總行下 紮營，佔領中環。有得還就銀行贏晒，冇得還就我哋硬食，仲要鼓勵啲唔應該借錢嘅生意佬，老奉攞錢先。

官喺呢份末代預算話有咁嘅計算，其實係面試緊入標普、穆迪做嘢，因為歷史證明信貸評級公司做唔到，不過啲官覺得做到。再唔係，就係博去布魯塞爾，教歐盟啲官點吹水呃人。
聽 啲姨媽姑姐話，男人大使都有個譜，最怕義氣去做擔保。一旦做貸款擔保人時，就可能發生黑天鵝。最佳例子係千禧年代，年年財政有大額盈餘嘅愛爾蘭政府，因為 幾年前一句「擔保所有銀行」，令全國大幅減人工、失業率飛升、走得嘅着草。不過因人民未來賤如泥，臨拍屁股嘅人又點會理？不過愛爾蘭及其他因擔保而出事嘅 地方，啲以前次次選舉後執政嘅大黨，再選時差不多滅黨。我哋特區終極話事嘅係共產黨，曾爵士真係勁過 James Bond咁玩嘢。

睇吓唐英年第時點拆

我相信，未爆煲前，仲會有啲政棍行出來，話呢個計劃有幾咁成功，政府收保險費收到手軟。呢啲政棍似乜？咪就係當年喺花旗國話兩房好成功嘅人囉！爆咗之後先潛水當冇支持過。
仲 有，呢份預算案另一炸彈位，就係佢話，政府大力投資基建，建造業對工人需求大增，失業率現為 5.2%，比 08年 12.8%低。仲話政府會叫新人投身建造業。 And you are proud of this？當初 08年，一班社運份子叫紮鐵工人罷工，起因係特區總體對工人嘅需求減少。你家就政府起嘢，話叫後生入行？唔係嘛？害人都唔好咁玩得唔得呀？各位社運份 子，政府明知冇 point起第三條跑道都要起，係因為你哋「成功爭取」咋！
點都好，我日日睇住日曆，希望快啲換屆。唐英年，希望你上任後盡快拆彈。
孫柏文
獨立股評人
本欄逢周二、四刊出

(孫柏文)

網頁： http://phatdat.blogspot.com