陸Sir 講價值投資

價值投資
2009/2/5 上午 09:12:40網誌分類: 經濟
昨日亞洲及歐洲股市繼續造好。但喺失業數字攀升、多家巨企業績差勁，而振興經濟方案前景又唔明朗嘅困擾下，美股先升後跌，8,000點大關再次失守。杜指早段跟隨外圍升勢，最多曾升過84點。之後傳出思科(Cisco) 、零售商好市多(Costco Wholesale)、迪士尼(Walt Disney) 、卡夫食品(Kraft Foods) 、時代華納(Time Warner) 等巨企季度業績都錄得嚴重虧損，ADP資料預測1月份私營部門失業人數高達52.2萬人，而參議院對奧巴馬刺激經濟方案意見仍未統一，前景充滿變數，打擊市場投資氣氛。杜指在上午中段見頂回落，跌幅不斷擴大，至午後最低的7,929點才喘定，尾市在低位窄幅橫行。

杜指收市報7,957點，跌122點或1.5%，全日最高8,162點，最低7,929點；標普500指數報832點，跌6點或0.8%；納指微跌1點，報1,515點。紐約證交所成交13.9億股。杜指期貨最新報7,925點，跌61點，比現貨低水32點。

昨天一眾網友提到一個價值投資的問題，值得一書。網友趙子龍謂：「如果8號仔私有化成功，真係經典，係一次財技既勝利，同樣係小股東嘅失敗。當股份基本因素改變，而股價大幅下跌，係應該走得快好世界，不要迷信甚麼價值投資，愈跌愈買，開始擔心小了。」

網友牆頭草回應謂：「趙將軍，對啊，呢次海嘯最大頓悟是：價值投資是大戶人家的玩意，真正價值你懂嗎?價值轉了你知嗎?」

8號仔真係一個經典，如果一個股民在2000年科網股高峰期以摸頂價28元買了8號仔，佢私有化價錢係4.5元，記住股份曾經5合1，即係5合1前的0.9元，28元變0.9元，引用一個電盈小股東嘅比喻，真係「鑽石都變成玻璃」。私有化方案昨日最終喺股東特別大會獲得通過，而家連報仇嘅機會都冇埋。

香港電訊當年係一隻大藍籌，好多退休基金都有投資佢，但落得如此下場，寧不令人扼腕三嘆。不過在金融海嘯之下，當年在香港電訊風光年代買落的股東並不孤單，世界上同類例子比比皆是，例如美國保險業龍頭AIG現時1.08美元，但1年高位已經是55美元; 按揭證券公司房利美仲衰，而家0.56美元，一年高位34美元; 曾經是全球最大銀行的花旗銀行現價3.46美元，一年高位28美元; 呢啲公司過去都係美國同業之最、世界之首，但一年之後，股價得番高位1.6%、2%，仲衰過電盈! 千祈唔好誤會我咁講係幫電盈講好說話，而係話好多美國大公司都衰到貼地。大公司和可靠性並不能劃上一個等號。

我在10年曾問一個外資投資銀行的頭頭，問佢見盡咁多間公司盤數，對公司一定有好深的瞭解，邊一間公司可以「合埋眼去投資」呢? 佢不假思索咁話匯控(00005) ，佢話匯控管理良好，係唯一一間可以合埋眼去買而唔會輸錢的公司。10年過去，在環球金融海嘯下，匯控深度下跌，過去兩年買匯控一樣要輸大錢，可惜無機會再見到呢個投行大佬，問嚇佢對匯控的最新看法，但由於買匯控一樣要輸，相信佢都會改變「合埋眼去買匯控」呢個講法。或者佢會答話：「見到百年一遇的金融海嘯，你仲合埋眼去買?」

買電盈、買匯控，甚至買美國巨股都要輸錢，難免令人生起價值投資唔得的想法。趙子龍話「不要迷信甚麼價值投資，愈跌愈買」，牆頭草更謂：「價值投資是大戶人家的玩意，真正價值你懂嗎?價值轉了你知嗎?」質疑得也有道理。

我仍然相信價值投資法，但只是講若是「投資的我」，長線投資要睇公司的價值，主要是睇佢嘅賺錢能力，而唔好盲毛毛人買你又買。但對包括股神巴菲特自己都講的「愈跌愈買」之手法，我卻不太敢苟同。

買入一隻股後佢跌價１０％，即使唔會係炒賣，即使我唔止蝕，但一般都唔會愈跌愈買（除非一早定了按什麼價位分注入貨），跌多過２０％更加多數唔會再買，那時就要用放大鏡去睇嚇自己係唔係真係懂呢間公司的真正價值，要問公司的基本經營環境有無重大轉變，若有疑問，應該減持而唔係增持。

電盈的例子太明顯，2000年時盈科併購香港電訊，兩隻股各自炒到3,000億市值，簡直貴到離哂譜，即使一間公司市值3,000億，去番正常10多倍PE，電盈要年賺200幾億才算合理，電盈最賺錢的IDD專營權賣番俾香港政府，本地電話專營權又無肉食，點賺200幾億呀? 電盈的例子太明顯了，如果你願意研究公司價值，應該睇到。

匯控的例子含糊一點，但大家應該記得我講過一個事例，接近一年前，有個小富婆見匯控下跌，用126元買了它，後來插穿120元時佢好緊張咁問我點算，我叫佢定止蝕位，後來隻股又升番上126元樓上，佢又變得好情緒高漲，我當時俾佢最後的建議是以126元買入價作止蝕，唔跌穿摣嚇，再跌穿呢個位最好打靶。一年過去，我再遇到小富婆，原來佢無沽到，現在雖然口硬，但後悔之情溢於言表。匯控的險情雖然唔係咁清淅，但佢有三份一業務係美國的次按業務，明顯摣住個炸彈喺手，次按危機07年尾已開始爆，去年已露出少少危機端倪，所以我當時的建議是要佢定止蝕位，唔係愈跌愈買。後來匯控跌穿100元時，我對呢隻股嘅戒心再加重咗啲，佢跌穿呢啲大位後我更加無叫人買。

我地唔係大戶，大戶掌握的資訊比我地多得多，但我仍然堅持長線投資者要睇公司的價值，而諗嚇公司未來幾年盈利的變化，係睇價值最簡單的方法。基本上唔好愈跌愈買，而係一開始急跌就要重新審視公司的經營環境同價值有無重大改變。若果唔識睇間公司的經營環境有無大變，就睇嚇佢在世界各地同業的股價變化，也是一個有效參照，若美國鋁業跌到阿媽都唔認得，我地點可以期望中國鋁業(02600) 大升?同樣道理，摩根大通唔掂，亦唔好期望匯控好好境。最後想加一句，睇公司價值只是一個開始，並不是終結。

陸羽仁