智取大市：簡單方法分牛熊

港股由2月12日低位至今，上升20.2%。呢個位係一個交叉點，如果睇牛市，就係一個開端，仲有排升；睇熊市嘅話，就係反彈浪接近終結，呢個位買貨，隨時跌入無間地獄。點樣預測，會影響你以後一舉一動，除非你乜市都炒，或者乜市都唔炒。
今次各方面宏觀消息以至基本因素，都相當複雜。面對最複雜嘅環境，就不如用最簡單、原始，但又客觀嘅統計，去辨別是牛是熊。
2 月12日至今，恒指反彈20.2%，為時5個月零10日，如果計番過去五次熊市，分別係1995年、1998年、2003年、2008年及2011年嘅最低位起計嘅5個月零10日，升幅分別係32.6%、48.8%、39.3%、39.8%同31.8%；即係相同時間長度之下，一個真牛市，升幅往往三成以上，但今次得兩成，證明一點，今次上升動力明顯不足。如果牛市有樣睇，今次見到呢個就唔似牛市喇。
短線嚟講，上周五市況比預期好，恒指只係跌36 點，手機股信利（732）爆升，網龍（777）亦突破，本地地產股暫時回吐幅度有限。之前講過轉為觀望，策略上就由全攻型，變成打游擊，但求捕捉剎那短炒機會。

晉佳
http://www.fb.com/advanceguy1