Money Walker：泡沫爆破導火線

久唔久就會有啲末日派走出來話危機殺到叫大家小心，今次輪到筆者。
美國加息通常都係引爆危機嘅導火線，因為寬鬆貨幣政策永遠都會鼓勵借貸投機，從而間接催生資產泡沫，所以到美國貨幣政策收緊之時，多數都會觸發泡沫爆破。
過往經驗顯示，美國加息周期展開唔會立即觸發恒指見頂，但會導致美國本身或者新興市場泡沫醞釀爆破。
所以加息後恒指唔一定即時見頂，但一段時間後隨住危機出現，恒指亦會展開中期跌浪。由於大型泡沫爆破往往牽連甚廣，即使香港唔係風眼亦難免受累。
但唔少分析都認為，今次加息唔會觸發泡沫爆破。因為過往每次危機爆發之時，美國嘅利率都超過5厘，反觀現時美國指標利率極低，介乎零至0.25厘，而且儲局主席耶倫已無數次重申加息步伐循序漸進，市場更估計就算至明年底，利率頂多都只會加到去1厘。
不過筆者認為，加得慢並唔代表泡沫唔會爆。美國前後三輪量寬，過去7年已鼓勵大量借貸投機，而由兩年幾前，儲局減慢買債開始，美國實際上已展開收緊貨幣政策嘅過程，步入加息周期只代表進一步收緊。
基於以上原因，今輪加息周期，觸發泡沫爆破所需嘅利率水平低過以往並不出奇。執筆時議息結果未出，不過市場幾乎肯定會加0.25厘。
雖然今次加幅比較細，而且未來唔會每次會議都加息，但新興市場走資同美國高息債市場動盪呢啲加息副作用，加息前已率先顯現，反映加得少同加得慢，唔等於對資產市場冇影響，但就可能有助延後危機爆發嘅時間。

El.
本欄逢周二、四、五刊出