美股又可以玩幾耐

Money Walker：美股又可以玩幾耐 

港股近年冇乜力上，加上喺香港買美股比以前方便咗，用網上broker買手續費極平，所以越來越多散戶將戰場由港股擴展至美國。
不過筆者認為，同港股一樣，美股嚟緊都一樣無法逃離熊市嘅縮命。原因好簡單，唔講基本因素，連技術分析都唔同你講，淨係拍埋恒指同標普500指數嘅走勢睇，已經明顯見到自1998年以來，兩者見頂同見底嘅時間非常接近。
恒指同標指都喺1999至2000年科網泡沫爆破期間見頂，並於2002至2003年見底。
港股同美股齊齊維持咗四至五年升勢後，標指2007年因美國爆發次按危機而見頂，恒指同年亦因憧憬港股直通車，衝上31958點嘅歷史高位，結果隨住直通車急剎停，連同次按所引發嘅金融海嘯，恒指最後蒸發咗六成幾。
跌足一年半後，標指終於喺2009年3月6日創出666點嘅低位，其後以V彈之勢回升，恒指亦喺3日後做咗11344點嘅底部，繼而回升。
冇錯，恒指呢幾年升跌真係唔多跟標指，呈上落市格局，反觀標指則一路向上，反映港股同美股相關性有所降低，不過筆者認為，兩者仍有一定相關性。
睇返今年4月港股大時代見頂之日，同標指創出歷史新高嘅日子，兩者相距其實唔夠一個月。恒指今年4月27日於28588點見頂，標指則在5月20日創出2134點嘅歷史高位。
恒指已經步入熊市，家陣喺高位徘徊嘅標指到底仲可以頂到幾耐？美國結束量化寬鬆再象徵式加一次息，係咪真係對美股冇影響？港股唔升轉戰美股又可以玩到幾耐？大家不妨諗諗。

El.
本欄逢周二、四、五刊出