一場海嘯內銀改革白廢

金手指：一場海嘯內銀改革白廢

前日，睇住阿爺出手，股市就大彈。家市場真係好多消息，堅定流都未有定案，不過大家都反射式咁炒番轉先。早幾日，同一個 Broker朋友傾計，問佢點睇大陸經濟，佢一句：「其實對我來講，大陸已經爆咗。」佢有咁嘅結論，真係唔怪佢，因為連銀行放貸嘅 Quota都傳話用唔晒。
記得舊年呢個時間，大陸超乾塘，個個喺大陸有錢嘅都走咗去做大耳窿，今年就錢多到借唔晒，可能真係冇借錢嘅需求。再諗深一層，可能大陸啲銀行驚有呆壞賬，所以行事都會小心啲。

歐債要斷尾　歐元會喪跌

對於改革開放，銀行業其實去到08年，係越來越專業，風險管理主導。點知一場金融海嘯，幾萬億元嘅貸款，就令多年來辛辛苦苦嘅改革大幅倒退，埋下壞賬又唔知會有幾多。
最弊係當銀行唔理風險管理咁借，衍生出來嘅問題就會係邊個先借到，亦即係邊個夠牙力，就邊個借到。喺咁嘅情況下，就會爆出好多貪污問題，長遠而言，只會削弱金融系統穩健程度，最後連國家本身嘅穩定都會有打擊。
講到壞賬，就不能不提西班牙間 Bankia。呢間銀行其實係之前西班牙啲本地銀行，合併原意係為咗溝淡啲呆壞賬，點知個結果係鐵索連舟，火燒連環船。
最大問題係，西班牙政府話會國有化呢間銀行，即係銀行欠嘅錢，條數由政府孭。不過當西班牙本身都冇錢，自己借錢成本不斷上升，呢個國有化擔保，冇人信。
嗰日，孫柏文同獅子山學會嘅王弼傾起，究竟個 End Game會點，結論就係都係要歐央行印鈔，不過上轉印完之後，好似冇乜用，原因係借錢畀啲銀行，根本解決唔到佢哋個核心問題。佢哋啲銀行嘅問題係資不抵債，而唔係周轉不靈。
所以如果要解決呢個核心問題，歐央行印鈔分分鐘要入股呢啲銀行，普通股或優先股，最緊要係可以當筆錢係資本。如果出呢招，歐洲呢場風暴就真係打完，不過歐元就應該跌到七個一皮。
仲有，當歐央行係股東，佢哋就要有控制權。王弼直言喺咁嘅情況下，德國就真係話事，歐洲亦會步日本後塵，一衰就衰幾十年。

日棄核電　外貿赤字難免

講到日本，佢哋決定將所有核電站關閉，係一項好難做嘅決定。唔夠電都算，因為要用天然氣發電，所以佢哋將會面對結構性嘅外貿赤字。一路以來，大家點睇淡日 本，都仲有外貿盈餘頂住，一但冇咗，就連最尾呢條柱都冇埋。仲有，日本人嘅儲蓄率非常低，到時候如果再冇人接貨買佢哋啲國債，咁就真係 Game Over。
債，如果借得多時，加埋日積月纍，要爆，其實可以好快。全球現吹減債潮，情況同香港喺97年之後一樣，不過當全球都減債，金融業會好難 撈。我成日同啲後生講，喺花旗國1929年信貸額見頂之後，要好幾十年先搞番旺個市。債券 Trader直情要夜晚喺油站兼職先維持到生計，希望家入行嘅後生仔女，冇入錯行啦。

孫柏文
作者為獨立股評人
本欄逢周二、四刊出