六個唔買內銀的理由

周日趣 BLOG BLOG：六個唔買內銀的理由

2011年10月02日

有 讀者詢問現時是否可以買內地銀行股，原因大致上離不開「估值平、跌得多、海嘯價」，同黃興桂形容前曼聯球星 加利尼維利「無速度、唔夠快、轉身慢」有得揮。睇上半年業績，四大內銀盈利增長最少有 28%，講估值，內銀預測市盈率（ PE） 5至 6倍，預測市賬率（ PB） 1倍多少少，絕對稱得上「平、靚、正」。
但股價跌到如此，是投資者唔識貨、抑或另有玄機，以下是筆者六大唔買內銀的理由。
（ 1）估值貴。衡量內銀估值平或貴， PB好過 PE，曾是全球最大的花旗銀行， PB跌到 0.43倍，歐美行業 PB平均僅 0.40倍，但四大內銀 PB平均仍有 1.05倍，估值較歐美貴 1.6倍。或者你指歐美銀行咁平是因為持有問題債券，但有留意近期溫州企業老闆走佬潮，這個中國次按式炸彈，破壞力足以令內銀瓜柴。
（ 2）未衰夠。四大內銀今年累跌 34%至 40%，但問題係，希債仲未爆煲、 9萬億地方債還未出事，以及走佬潮未擴散到其他省市，已經跌成咁，真係發生的話，就算阿爺要救都救唔到。

中行農行已穿招股價

（ 3）要撇賬。 08年中央為救市，推出四萬億刺激經濟方案，市場資金突然變得寬鬆，銀行追着企業借錢，促使企業大範圍擴展業務。到去年突然銀根收緊，只收錢不借錢，企業 背負重債但設備卻跟不上需求。中資企業最新財政報告，很多已出現負現金流，一年到期借貸還多於手頭現金，資不抵債，銀行將是最後大輸家，未來撇賬隨時動輒 千億元計。
（ 4）勁抽水。過去三年，內銀不停輪流供股發債抽水，很多內銀高層拍心口未來兩年不會融資，但現時內銀核心資本充足比率只是剛剛合格，再來一場金融浩劫，抽 水會是大勢所趨。現時不要講息率如何吸引，股價如何超賣，長期持有內銀的投資者有否計過，上市至今獲取的股息，一次配股已經無晒。
（ 5）蟹貨多。中行（ 3988）及農行（ 1288）已經跌穿招股價，工行（ 1398）及建行（ 939）分別失守 4蚊及 5蚊大位，坊間散戶蟹貨一籮籮，睇住升得咁痛苦，何必要自我虐待呢！
（ 6）名燈準。昔日名牌分析員以及坊間一名超級燈神，今年由朝到晚吹捧內銀抵買、沽貨正儍仔，我心一沉，連阿爺（社保基金）都不停減磅，鶽家仲唔走貨，就真係儍仔啦。
股榮