青心直說：中港股市唔買走寶？

青心直說：中港股市唔買走寶？
近期，特別是踏入 7月起，無論報章雜誌標題、分析員評論，以及大行報告意見，均不約而同大合唱，一致結論認為內地通脹見頂、股市抵買、盡快入市。
內地通脹見頂，是否代表政策鬆綁，早前已論述。想集中討論，中港股市估值，是否真正已到達投資者不能忽略的水平呢？即係 Too Cheap to Ignore，「唔買就走寶」！
目前，中資股及純港股的市盈率分別是 10.9倍及 14.6倍左右，至於預測市盈率則為 9.5倍以及 14.6倍。兩組的數字均較過往平均水平為低，特別是中資股。
所以，從自身價值衡量，話中港股市估值偏低屬合理。

盈利預測隨時調低

當然，「平」不代表一定要買，平嘢無好，好嘢無平，有時係平得有道理。更何況撇開政策性因素一環，兩地市場走勢最少受制三大問題，分別是盈利、視野及相對吸引力，到最後引伸到機構大戶加碼增持的意欲。
中港股市現時市盈率相對較低，是建基於年初大行相對較樂觀的盈利預測假設。過去大半年，中港股份仍未有一個較為明顯及大規模的盈利調整周期出現，所以一旦 8月起進入業績公佈高峯期，當部份中資及本港藍籌盈利貨不對辦，勢將觸發市場進行盈利預測調整，亦因而會把預測市盈率推高。
這亦解釋為甚麼今天的相對低估值，仍難吸引資金大舉流入，因股價反映盈利預測將被調低因素。
當然，個別股份例如裝備設備股，經過早前被大量拋空後，股價自高位插水三至四成，始見補倉食糊，可惜股價又難以回到未跌前，個別如三一國際（ 631）上周又再出現不尋常拋空，也絕不宜掉以輕心。
胡孟青
獨立股評人