Money Walker：暴風雨前的平靜

唔少市場人士都唔睇好港股喺內地降準後嘅表現，認為只會短短地彈一、兩日就完，結果港股周四表現真係麻麻地。
睇返恒指月線圖， MACD同EMA仲喺「熊區」，並未由跌轉升，技術分析上意味住恒指同真正嘅見底反彈時間仲有距離。既然港股長線未到真正反彈之時，就算出現任何反彈，都好大機會只會係短線。
不過以環球股市計，筆者傾向相信呢幾個星期向好嘅機會多於向淡。首先，內地現時至月中舉行嘅兩會，推出嘅措施有機會成為中港升市催化劑；其次，歐央行下周舉行議息會議，之前已事先張揚話屆時會檢討刺激措施。當然，筆者唔排除兩會同歐央行最後宣佈嘅措施會令市場失望，令到股市最終只係短線衝高一陣就回落返。
另外，市場情緒變化亦唔可以忽視。花旗之前講過，市場早排一度認為泡沫已經爆破咗，造成恐慌情緒升溫，但隨住市場發現經濟情況都仲OK，股市根本未夠鐘爆炸，資金於是又入返股市再炒過。基於呢個原因，短線市場表現理應唔會太差。
雖然係咁，筆者始終傾向認同野村首席經濟師辜朝明嘅睇法。辜朝明將現時市況形容為「暴風雨前的平靜」，質疑眼前嘅穩定性可以維持幾耐。
咁到底遲啲觸發暴風雨來臨嘅會係乜野因素呢？筆者當然唔知，只能講如果係外圍因素，極有可能係同聯儲局加息有關。
市場之前一度預期美國今年全年唔會加息，就算加都頂多都只得一次，所以倘若加息預期再度升溫，就要小心會將市場再度推入risk off mode。

El.
本欄逢周二、五刊出