愛國愛港：富二代提款機

投資一周：富二代提款機

某位年輕富豪二代一直在努力工作，想做未來的行政長官，已經是路人皆見的事了。有天，我和幾位朋友在花園吹水，當中有上市公司（的幕後）老闆，也有和泛民 政客稔熟、但又和共產黨同路的政治專家，大家講起這個問題，我斬釘截鐵地說：「如果他能當上行政長官，這也許是唯一能夠幫助他家族的做法，只可惜，成功的 機會是零。」

捐錢換取公職

朋友說：「他好似好積極去做嘢，形象又很好，兼且很受到賞識噃。」
我說：「首先，如果沒有太大的意外，以後每一屆的行政長官，必要條件是他必須要是共產黨員。因為，如果這一任特首是黨員，下一任不是，這叫做『黨主大倒退（即是『民主大倒退』的相反詞）』，是中央所不能忍受的。這位富二代若不是根正苗紅的共產黨員，自然不可能當特首。」
（按﹕本人的政治立場是「愛國愛港」，以上只是客觀的描述，絕無他意。）
朋友說：「但政府好似好睇佢噃……」
我說：「佢幾億幾億咁捐，好過撳機，你諗諗，同佢玩，一年坐底收十億八億，出了錢仲要出埋力，如果唔受佢玩，家族隨時幾百億撤資，一個net cash in，一個net cash out，傻都識點揀。」
朋友說：「你咁講，好似一個騙局？」
我說：「咁又騙局唔晒嘅，我相信他撈撈吓，再捐多三幾十億出嚟，好快會有公職，局長司長安慰獎都會有，不過特首睇怕就……」
上市公司老闆問：「咁佢家族間上市公司買唔買得？會唔會偷晒啲錢走佬？」
我說：「佢點敢？間上市公司一定依正法律去搞，賣嘢、收租、派息，絕對唔敢亂嚟，否則搞臭個朵，第二代嘅仕途就完蛋了。不過，呢隻股票絕對唔掂得，因為唔搞嘢，股價必定會慢慢向下……」

周顯
投資者、八卦公、知識分子
phemey@gmail.com
本欄逢周三刊出