2015年8月20日星期四

每日一趣：最紅分析員講真話

講起所謂嘅A股牛市，有一位內地重磅人士不得不提，佢就係國泰君安證券首席分析師任澤平，之前官拜國務院宏觀經濟研究部副主任，去年9月下海投身券商後，發表報告唱滬指將衝上5000點，成份報告都係文革口號，稱「黨給我智慧」，震撼股壇。由於佢實在太猛料，當時市場都以為中央有指示，之後A股開始狂升。
A股而家半死不活，呢位股市中的黨代表，會點睇後市呢？最近兩日，網上流傳任澤平的一篇名為《對時局的看法：幾句真話》文章，裏面對A股極度悲觀，批評中央做法的言辭凌厲，簡直判若兩人。
作為國務院前高層，任澤平在這篇感言中，洩露咗國家機密。「2015年上半年真實的GDP實際增速5%，名義增速僅3%。人民幣沒貶到位，還有貶值預期。」
佢對國企改革亦極度失望，「國資委談國企改革，計生委談放開二胎，發改委談投融資體制改革，無異與虎謀皮。不改革也就算了，國改竟然倒退，這算不算超預期？」對於後市，任澤平警告，市場沒有趨勢，只有震盪，上衝4000就謹慎，下破3500適度樂觀，不停的震不停的盪，尋底路漫漫。
內地券商都是國企，券商所發的報告都係官樣文章。任澤平自己承認，目前政治壓力下，「經濟不能說差，貨幣不能喊貶，市場不能唱空」，所以真話，只能講幾句。任澤平其實呢兩日仲有出報告，唱好國企改革股，但佢都講到咁白，叫你唔好信，可見有幾真喇。

黃尹華