異動空間：最易輸身家的交易

每個硬幣總有兩面，上周分享過高追的技巧，今日講吓撈底的藝術。二線濠賭股炒爆散水，唔少戰友在fb問道：幾時撈得？魏力的回答都係：千祈咪撈。「你剛推 介澳門實德（487），開市都0.53元，當時你話買得，今日（上周五）收0.52元，仲抵買咗，點解唔撈得？」不如在此解釋一吓。
炒開股應聽過 「順勢而行」，但九成人都做唔到，因這是違反人性的行為。常人心態係：買衫都等減價，炒股梗係越跌越抵買啦！不知不覺就形成「升唔敢追、跌就溝貨」的思 維。以澳門勵駿（1680）為例，10蚊見頂後殺落9蚊，你撈一注，唔夠一粒鐘插到8蚊，「溝一溝，博好快見家鄉！」再撈一注，結果7.6元收市，當每次 買1萬股，成本17萬元，埋單得番15.2萬元，一個下晝唔見萬八蚊。多做幾次呢類交易，身家好快蒸發晒！
咁幾時先撈底？方法有很多，但肯定唔係跌住買，而係等跌定、出現回升訊號先入場，例如圓底回升、突破橫行區，或日線圖出現「破腳穿頭」訊號。升市莫估頂、跌市莫估底，真的十分有道理。
個市處於跌唔落、升唔上的尷尬局面，科網股整體仍強，騰訊（700）創新高，下一隻應到聯想（992），股價近期沿20日線而上，上月中創9.56元新高後，整固已達半個月，現呈突破之象，可買入作中線投資，目標先睇12蚊。

魏力
http://www.facebook.com/2012jason