飛砂風中轉之賊竇

青心直說：飛砂風中轉之賊竇
2011年06月28日

上周五恒指絕地大反彈，有如古惑仔一招凌空虎尾踢，踢高中移動（ 941）後再橫掃過去。未知是否用力過度，急彈抽高後，部份累跌幾成的股份成功雖見平倉盤推動反彈，卻多半彈唔足，股價仍未能回到未跌時。
之前唔肯跌嘅就俾人隊到一仆一碌，正如隻雨潤食品（ 1068）未見 Window dressing，先見 Profit taking，午後急跌，足以為上周嚴重拋空解畫，造世界方式同早前高端裝備股如出一轍，由於公司份屬民企，在一片恐慌性人踩人場面下，傳聞話會成為「渾水」下一個攻擊對象。觀察「渾水」網站，暫時未見相關報告，但經過嘉漢林業一役，有理由相信背後拋空盤屬有組織有計劃之預謀造世界大行動，報告未出，股民已如驚弓之鳥，看來以後「渾水」根本不需要出報告，反正傳聞已足夠殺人於無形。

疑似借消息造市

假如傳聞屬實，監管機構要調查嘅唔係被質嘅上市公司，而是發表評論前已扒頭沽貨甚至拋空的機構投資者，睇睇有冇人借消息造市。
前日巧遇一代輪后，言談間對金融界毫無眷戀，專注湊仔，最頂癮係佢話家市場多賊。身處其中，老實話你知周圍都係賊，就嚟分唔清邊個係人邊個係鬼，學電影《飛砂風中轉》主題曲「人多勢眾」話齋，「打唔係問題，夠薑就出嚟，吹雞我哋呢班吹得最齊……講人多我哋最多兄弟。」
大戶造市無所不用其極，夠薑你就出嚟博反彈，震你唔死就係英雄。睇班大行日日係咁吹，冇古仔都要阿茂整餅，除咗量化寬鬆，堪稱本世紀最大型造市計劃，最近可以數臨近半年結加期指結算前，攞出疑似狗仔隊偷拍嘅鬆郁朦照片，仲要係影背脊，就無限放大製造想像空間，成功將中移動移動一下，更成功以四兩撥千斤。外面多賊，所言非虛！

胡孟青
作者為獨立股評人